أدلة الاستئجار

تسليم الشقة للمالك بعد انتهاء العقد: خطوات الخروج خطوة بخطوة

نُشر في • ٧ دقائق قراءة

بقلم Fahad Albedah، الرئيس التقني

عقدك قرّب يخلص؟ أوقف التجديد التلقائي قبل 60 يوم، ورتّب التسليم خطوة بخطوة: المفاتيح والعدادات ونموذج التسليم في إيجار، عشان تطلع بدون التزامات ولا خلافات.

في هذا المقال
  1. متى لازم تبلّغ المالك؟
  2. وش تسوي خطوة بخطوة؟
  3. وش عليك ووش مو عليك يوم تطلع؟
  4. الأسئلة الشائعة

قررت تطلع. يمكن لقيت بيت أوسع، أو انتقل دوامك لمدينة ثانية، أو بس عقدك خلص وودك بتغيير. رتّبت الكراتين، وحجزت النقل، وجيت تسلّم المفتاح… وهنا بدأت المفاجآت: العقد تجدد لحاله، وفاتورة الكهرباء للحين باسمك، والمالك يقول الجدار اللي خرّمته للتلفزيون لازم يتصلّح.

أغلب المستأجرين يركزون على البيت الجديد وينسون البيت القديم. وفي هالمقال بنشرح لك وش المفروض تسوي من يوم تقرر تطلع لين ما تسلّم المفتاح، عشان تطلع بدون التزامات معلّقة ولا خلافات.

بس قبل ما نبدأ، خلنا نوضح نقطة: هالدليل للي عقده خلص أو بيخلص وما يبي يجدد. أما لو تبي تطلع والعقد للحين في نصّه، فهذي قصة ثانية لها قواعدها الخاصة، وشرحناها في دليلنا لإنهاء عقد الإيجار.

متى لازم تبلّغ المالك؟

أهم موعد في كل الرحلة: 60 يوم قبل نهاية العقد.

من سبتمبر 2025، صارت عقود الإيجار في كل مدن المملكة تتجدد تلقائيًا (بالإنجليزي)، إلا لو أحد الطرفين بلّغ الثاني إنه ما يبي يجدد قبل 60 يوم على الأقل من نهاية العقد. ومنصة إيجار توضح إن القاعدة تشمل العقود اللي مدتها أكثر من ثلاثة أشهر، والتجديد التلقائي مفعّل أساسًا في العقود الجديدة. والتفاصيل كاملة في دليلنا لتجديد العقد.

يعني لو نسيت وفات الموعد، عقدك بيتجدد لمدة جديدة، وبتصير ملتزم فيها.

والخبر الحلو: كمستأجر، تقدر توقف التجديد التلقائي بنفسك من حسابك في منصة إيجار بدون أي شروط ولا تحتاج تبرر، بس لازم يكون قبل ما تبدأ فترة الـ 60 يوم. والطرف الثاني توصله رسالة تبلّغه.

ونصيحتنا: حط تذكير في جوالك قبل نهاية العقد بـ 75 يوم. كذا يكون عندك وقت تقرر وتبلّغ بدون ضغط.

وش تسوي خطوة بخطوة؟

قسّمنا لك المهام حسب الوقت، عشان ما يتكدس عليك كل شي في آخر أسبوع.

1. قبل نهاية العقد بـ 60 يوم أو أكثر

  • وقّف التجديد التلقائي من حسابك في إيجار، أو بلّغ المالك كتابيًا إنك ما تبي تجدد.
  • احفظ صورة من الإشعار أو الرسالة اللي توصلك.
  • حدد تاريخ تسليم المفتاح مع المالك من الحين، وخلّه في يوم نهاية العقد أو قبله.

2. قبل التسليم بشهر

  • شيّك على اشتراكاتك: الإنترنت والتلفزيون وأي خدمة مربوطة بالعنوان. بعض الشركات تحتاج إشعار مسبق قبل الإلغاء أو النقل، فلا تخليها لآخر يوم.
  • راجع التعديلات اللي سويتها: نظام المعاملات المدنية (المادة 432) ما يسمح للمستأجر يغيّر في العقار بدون إذن المالك، إلا لو كان التغيير لازم للإصلاح وما يضر العقار. فلو ركّبت رفوف أو علّقت تلفزيون أو غيّرت لون جدار، اسأل المالك كتابيًا: ترجّعها مثل ما كانت، ولا تخليها؟
  • صلّح اللي خرب بسببك: النظام يحمّلك الأضرار اللي سببها استخدامك أو تقصيرك (المادة 430). فلو فيه شي انكسر عندك، صلّحه قبل التسليم.

3. قبل التسليم بأسبوع

  • نظّف البيت: خصوصًا المطبخ والحمامات وفلاتر المكيفات.
  • رجّع البيت فاضي: لا تخلي أغراض أو أثاث، إلا لو اتفقت مع المالك كتابيًا.
  • جهّز كل المفاتيح: الأبواب والبطاقات والريموتات، بنفس العدد اللي استلمته.

4. يوم التسليم

5. بعد التسليم

  • عدّاد الكهرباء: لما ينتهي العقد أو ينفسخ، العداد ينتقل باسم المالك (بالإنجليزي)، والمسؤولية ترجع له بعد ما تطلع. بس سدّد آخر فاتورة لاستهلاكك أنت، وتأكد إن العداد فعلًا انتقل.
  • حدّث عنوانك الوطني: من منصة سبل أو أبشر، عشان توصلك شحناتك ووثائقك الرسمية على البيت الجديد.
  • احفظ ملف التسليم: الصور والفيديو ورسالة استلام المفاتيح ونموذج إيجار، في مكان واحد.

وش عليك ووش مو عليك يوم تطلع؟

مو كل شي في البيت مسؤوليتك وقت التسليم. هذي الصورة العامة باختصار:

الحالة عليك ولا لا؟
ضرر سببه استخدامك أو تقصيرك عليك
استهلاك طبيعي، مثل بهتان الصبغ أو خدوش بسيطة مو عليك
عيب كان موجود قبلك ووثّقته يوم الاستلام مو عليك
تعديل سويته بدون إذن المالك غالبًا عليك ترجّعه مثل ما كان
فواتير الكهرباء لين يوم طلعتك عليك
فواتير الكهرباء قبل ما تسكن مو عليك

والقواعد ورا هالجدول في نظام المعاملات المدنية (المواد 430 و432 و435): ترجّع العقار بالحال اللي استلمته عليها، إلا اللي يستهلكه الاستعمال المعتاد، وتتحمّل الضرر اللي سببته. وعن الكهرباء، الشركة السعودية للكهرباء تقول إن المستأجر مو مسؤول عن الفواتير السابقة على العداد المربوط بالعقد.

وانتبه لنقطة مهمة: لو خلص العقد وأنت للحين في البيت بدون اتفاق، النظام يعطي المالك حق يطالبك بأجرة المثل (المادة 435) عن الفترة الزايدة، وفوقها تعويض لو تضرر. فلا تأخر التسليم بعد نهاية العقد بدون ما تتفق مع المالك كتابيًا.

وإذا بتنتقل لبيت جديد، ما تحتاج تجمع إيجار سنة كاملة مقدّم وأنت للحين تدفع على البيت القديم. مع ايجاري، المالك الجديد يستلم إيجار السنة كاملة، وأنت تدفع شهري.

استأجر بيتك الجديد مع ايجاري وادفع إيجارك على دفعات شهرية.

الأسئلة الشائعة

متى لازم أبلّغ المالك إني ما أبي أجدد؟ قبل 60 يوم على الأقل من نهاية العقد. وتقدر توقف التجديد التلقائي بنفسك من حسابك في إيجار بدون أي شروط، بشرط يكون قبل ما تبدأ فترة الـ 60 يوم.

نسيت أبلّغ وتجدد العقد، وش أسوي؟ العقد صار متجدد لمدة جديدة، وأنت ملتزم فيها. بس تقدر تتفق مع المالك تنهونه بالتراضي، ولو ما وافق، تمشي عليك قواعد إنهاء العقد قبل نهايته.

هل لازم أرجّع الجدران لونها الأصلي؟ يعتمد. لو غيّرت اللون بدون إذن المالك، غالبًا مطلوب منك ترجّعه. ولو أخذت إذنه، فالأمر حسب اتفاقكم، وعشان كذا الأفضل تتفقون كتابيًا من البداية.

عداد الكهرباء ينتقل للمالك تلقائيًا؟ إيه. حسب الشركة السعودية للكهرباء، لما ينتهي العقد أو ينفسخ، العداد ينتقل باسم المالك. بس أنت مسؤول عن استهلاكك لين يوم طلعتك.

المالك ما رد ولا جا يستلم المفاتيح، وش أسوي؟ بلّغه كتابيًا بتاريخ التسليم، وصوّر البيت فاضي يوم التسليم، وعبّ نموذج التسليم في إيجار من جهتك خلال 7 أيام. كذا يكون عندك إثبات إنك كنت جاهز تسلّم في موعدك.

هالمقال للتوعية العامة، ومحدّث حسب المعلومات المعلنة حتى نوفمبر 2026. تفاصيل عقدك تحكمها بنوده، فراجعها وتأكد من الخطوات من منصة إيجار.

استأجر صح. ادفع شهري.

احصل على تسعيرتك الإرشادية في ثوانٍ. مجانًا، بدون التزام، وبدون أي شيء خفي.